Тайландын Ерөнхий сайд асан Такшин Шинаватрын охин, тус улсын түүхэн дэх хамгийн залуу Ерөнхий сайд, энэ жил 39 хүрэх Пэтонтан Шинаватра улсынхаа авлигатай тэмцэх газарт албан ёсоор хөрөнгө орлогын мэдүүлгээ илгээжээ. Тэрээр нийт 13.8 тэрбум баат буюу 400 сая ам.долларын хөрөнгө, түүний дотор тэргүүлэх зэргийн брэндийн 217 гар цүнх, дээд зэрэглэлийн тансаг хэрэглээний 75 бугуйн цаг, 23 автомашин, үнэт эрдэнийн 205 ээмэг, 67 хүзүүний зүүлтийн хөрөнгөтэй, мөн Японд газар, харин Лондонд хэд хэдэн үл хөдлөх эзэмшдэг хэмээн мэдүүлсэн байна. Эдгээрээс зөвхөн бугуйн цагууд нь гэхэд л дангаараа таван сая ам.долларын үнэ хүрэх гэнэ.
Өнгөрсөн есдүгээр сараас Засгийн газрын тэргүүнээр ажиллаж байгаа Пэтонтан Шинаватра сүүлийн 20 жилийн хугацаанд Тайландын Ерөнхий сайдаар тохоон томилогдсон Шинаватрын гэр бүлийн дөрөв дэх гишүүн юм. 2001-2006 онд засгийн эрх барьсан аав Такшин нь тэрбумтан бөгөөд нэгэн үе “Manchester City” хөлбөмбөгийн клубийг эзэмшиж байсны хувиар хувьдаа нийт 2.1 тэрбум ам.долларын хөрөнгөтэй, Тайландын хамгийн баян арав дахь хүн гэгддэг. Тиймээс Тайландын ард иргэдэд залуу Ерөнхий сайдынх нь хөрөнгө орлогын мэдүүлэг тийм ч гайхаж цочирдом мэдээ биш, харин ч шударга зангийнх нь илрэл мэтээр ойлгогдох нь илүү байгааг тэмдэглэх ажиглагч олон байна.
.avif)
