Хотын мээр Х.Нямбаатар их ноцтой зүйл ярилаа. Зарим тоо баримтыг ч эхнээс нь дэлгэв. Сүүлийн долоон жил нийслэлийн 1.6 сая иргэний эрүүл мэнд, амь насанд нөлөөлөх хэмжээний хариуцлагатай төрийн бодлого хэрэгжүүлж, шийдвэр гаргаж байсан хүмүүстэй холбоотой асуудлыг сөхөж гаргаж ирэв. Ингэхдээ хотын утаа буураагүй гэдгийг хүлээн зөвшөөрсөн.Өөрөөр хэлбэл, “Тавантолгой түлш” компанийн үе үеийн захирлууд утааг бууруулах нэрийн дор татвар төлөгчдийн мөнгөөр дургиж суусан бололтой.
“Тавантолгой түлш” компанийг Засгийн газрын шийдвэрээр 2018 оны хавар сайжруулсан шахмал түлш үйлдвэрлэхээр байгуулсан. Дэлхийн жишиг үйлдвэрлэл хөгжүүлнэ, чанарыг эрхэмлэн, хямд өртөг бүхий бүтээгдэхүүнийг үйлдвэрлэн зах зээлд нийлүүлж агаарын бохирдлыг бууруулахад бодитой хувь нэмрээ оруулна гэсэн том амбицтайгаар эхэлж байв.
Гэтэл өнөөдөр 1.2 их наяд төгрөгийн алдагдал хүлээсэн. Сайжруулсан нэг шуудай түлшийг 20.800 төгрөгөөр үйлдвэрлэж, 3750 төгрөгөөр зардаг. Хэрэглэгчийн тоо 10-хан хувиар өсөж байхад үйлдвэрлэлийн хэмжээ 200 мянган тонноор нэмэгдсэнийг шалгуулна. Түгээлтийн явц дундаас нүүрсний хулгай гараад байна уу, “Тавантолгой түлш” компанийг тойрсон бизнес цэцэглэсэн. Мидлинг, шуудай, тээвэр гээд маш олон бизнес цэцэглэсэн гэдгийг Х.Нямбаатар мэдэгдээд байна. Хотын дарга худлаа хэлэх, хариуцлагагүй зүйл ярих учиргүй.Тэгэхээр өнгөрсөн хугацаанд хотын утааг бизнес болгон цэцэглүүлж, түгээлт дундаас нүүрс “цавчсан” асуудалд хэн хариуцлага хүлээх вэ гэдэг асуудлыг ярих ёстой.
“Тавантолгой түлш” компанийг 2018 онд байгуулагдахад захирлаар нь М.Ганбаатар томилогдож байв. Тэрбээр дөрвөн жил энэ компанийг удирдаж 2021 оны наймдугаар сард ажлаасаа чөлөөлөгдөж улмаар БОАЖ-ын яамны дэд сайдаар тушаал дэвшсэн юм. Үүрэг гүйцэтгэгчээр тус компанийн дэд захирал Г.Ундармаа ажиллаж байгаад 2022 оны дөрөвдүгээр сард Төлөөлөн удирдах зөвлөлийн шийдвэрээр "Тавантолгой түлш" компанийн тэргүүн дэд даргаар ажиллаж байсан Ц.Даваацэрэнг дэвшүүлэн томилсон байдаг. Ц.Даваацэрэн Эрдэнэт үйлдвэрийн захирлаас хойш хэд хэдэн албан тушаал хашиж байгаад "Тавантолгой түлш"-д ирээд байсан юм. "Тавантолгой түлш"-ийн захирал Ц.Даваацэрэн тэтгэвэртээ гарч сүүлийн хагас жилд Ц.Лхагвасүрэнг оронд нь түр томилсон. Гэвч компанийн албан ёсны цахим хуудаст захирал Ц.Даваацэрэн гэсэн мэндчилгээ өнөөдөр ч бий. Ц.Лхагвасүрэн нь "Тавантолгой түлш" ХХК-д Худалдан авалт, тээвэр зохицуулалтын газрын даргаар ажиллаж байв. Өөрөөр хэлбэл, тус компани үйл ажиллагаа явуулсан долоон жилийн дөрвөн жилд нь М.Ганбаатар,гурван жилд нь Ц.Даваацэрэн захирлаар нь ажиллажээ.
Тэгэхээр “Тавантолгой түлш”компанийг 1.2 их наядын алдагдалд оруулж дампуурлын ирмэгт авчирсан, хотын даргын хэлдгээр нүүрсний дараагийн хулгай ч байж мэдэх ноцтой асуудал болоод утааг бууруулах ажлаа хангалттай хийгээгүйгээс нийслэлчүүдийн эрүүл мэнд эрсдэлд орсон. Тэр бүү хэл сайжруулсан шахмал түлшнээс болж хэдэн зуун хүн угаартсан гээд яривал хөндөх асуудал олон бий. Аудитын дүгнэлт гарахаар аяндаа тодорхой болох биз.
“Тавантолгой түлш”компанийг Английн орчны үнэлгээний газраас агаарын бохирдлыг 2,3 дахин, дотоодын судлаачид 50 хувь бууруулсан гэж дүгнэжээ
Хотын утаа буураагүй, “Тавантолгойтүлш” компанийн бизнес төлөвлөгөө болохгүй байна, халамж тараагч компани болж гэдгийг хотын удирдлагын баг мэдээлээд буй. Гэвч тус компанийн танилцуулгыг харвал Монгол Улсын Засгийн Газар, МҮХАҮТ-ын “Топ 100” аж ахуйн нэгж, “Цагийн хүрдийн баатрууд-2020” Үндэсний үйлдвэрлэлийг түүчээлэгч, 2020 оны Топ 100 аж ахуйн нэгж, Шилдэг татвар төлөгч-2020, 2021 онд салбартаа амжилт гаргаж,нийгэм эдийн засаг, улс төрд эерэг нөлөө үзүүлсэн аж ахуйн нэгжид олгодог “Блүүмбергавардс”-ын эзэн, Хамгийн сайн ажлын байраа хадгалсан 10 аж ахуйн нэгжийг тэргүүлсэн, “Таван толгой түлш” компани 2021 оныг эх оронч худалдан авалтын жил болгон зарлаж, үндэсний үйлдвэрүүдээ дэмжин ажилласан зэргээр тасралтгүй хөгжлөө гэсэн агуулга хөвөрнө.
Хамгийн хоржоонтой нь шахмал түлшний шинэ соёлыг Монголд нэвтрүүлсэн “Тавантолгой түлш” компанийг Английн орчны үнэлгээний газраас агаарын бохирдлыг 2,3 дахин бууруулсан гэсэн бол дотоодын судлаачид 50 хувь бууруулсан гэж дүгнэсэн гэдгийг компанийн цахим хуудаст бичжээ.
Мөн Улаанбаатар хотын иргэдийн угаарын эрсдлийг бууруулах,“Хяналтын төв” байгуулан, 24 цаг эрдэнэт хүний амь нас, эрүүл мэндийг хамгаалан ажиллаж байна. Сайжруулсан шахмал түлшний борлуулалтын 600 гаруй цэг,хангамжийн баазуудыг цахимжуулсан гэсэн байна. Эндээс харвал гадны байгууллага, эрдэмтэн судлаачид утааг 50 хувь бууруулсан гээд байдаг. Өнөөгийн хотын удирдлагууд “Утаа буураагүй” гээд байгааг харж болно. Хэн нь үнэн хэлж байна вэ.
.avif)
