.avif)
1970-аад оноос хойш Сири орныг захирсан Ассадын гэр бүлийн дэглэмийг эсэргүүцэн тэмцэгчид анх Хомс хотноо хүчээ нэгтгэсэн байдаг. Харин тус улсын алавит болон христийн зэрэг урсгалын үндэсний цөөнх хэдэн үеэрээ бусадтайгаа мөр зэрэгцэн амар тайван аж төрж ирсэн уг хот сүүлийн хэдэн сард Башар Аль-Ассадад нэгэн цагт үнэнч байсан хүмүүсийг хэлмэгдүүлэх, хоморголон устгах, хүн хулгайлах гэмт хэргийн үүр уурхай болон хувирчээ. Ассадын засаглалын үед нэг бол чинхүү үнэн итгэл үнэмшлээрээ, үгүй бол ердөө амьдрахын эрхээр Зэвсэгт хүчин, аюулгүйн албанд хүчин зүтгэж байсан алавит хүмүүс өдөр хоногийг айдас хүйдэстэй өнгөрөөх болсон; сайн цагийн авчирна гэж итгэж найдсан шинэ эрх баригчид нь өөрсдийнх нь эсрэг ил, далд гэмт хэрэг өдөөх болсон тухай иргэд ам дамжин ярих нь нэмэгдсэн байна. Харин өөрсдийг нь хамгаална, шинэ төр засгийнхантай яриа хэлэлцээ хийнэ хэмээн найдаж байсан алавитуудын аль л нэр нөлөөтэй гэсэн хүмүүс зугтах нь зугтаж, нуугдах нь нуугджээ.
Аль-Ассадын гэр бүл алавит урсгалынхан бөгөөд өмнөх засаглал дор зовж зүдэрсэн, хайртай дотнын хүнээ алдсан хүмүүс одоо энгийн алавит хүмүүсээс өшөө авч эхэлсэн, эсвээс өш хонзонгоо тайлах хүсэлтэй байгаад шинэ эрх баригчид ч, шашны хэт үзэлтнүүд ч тэгтэл санаа зовохгүй байгаа нь ард иргэдийг айлгах болжээ.
Хомс хотын ойролцоох алавит голдуу иргэд аж төрдөг тосгон гацаад руу хэт үзэлт зэвсэгт босогчид халдсан гэдэг мэдээ нэг бус дуулдсан ч тэр болгоныг баталгаажуулах аргагүй байгаа аж.
Энгийн иргэд, гэрчүүдийн мэдүүлснээр шинэ эрх баригчдын байгуулсан Төрийн албаны төв нэртэй газрууд өмнөх засаглалын үед ямар нэг эрх мэдэлтэй байсан хүмүүсийг бичиг баримт, зэр зэвсгээ тушаахыг ятгаж, шаардаж байгаа гэнэ.
Мөн томоохон хотуудын шалган нэвтрэх цэг болгонд нийтийн унаанд алавит хүн явж байгаа үгүйг шалгах, таарсан тохиолдол элдвээр шалгаж байцаах нь нэмэгджээ.
Хама, Хомсоос гадна алавит иргэд олноороо суудаг Тартус, Жаблэ, Латакия болон алавитууд төвлөрсөн жижиг хороолол, дүүрэг олонтой Алеппо зэрэг томоохон хотуудад ч гэмт хэрэг гарсаар байна. Их Британид төвтэй Сирийн хүний эрхийг ажиглагч нэртэй байгууллагын тооцоогоор өнгөрсөн арванхоёрдугаар сард Ассадын дэглэм нуран унаснаас хойш 322 энгийн иргэн шашны бүлгэм хоорондын зөрчилд амиа алджээ. Харин Сирийн шинэ эрх баригчид болох HTS буюу Хаяат Тахрир аль-Шам бүлэглэл өөрсдийгөө исламын хэт үзэлтнүүд биш, бүхий л сүсэг бишрэлийн хүмүүс нэгэн дор амар амгалан, айх айдасгүй аж төрөх ардчилсан улс байгуулахын төлөө зүтгэнэ гэж мэдэгдсээр байгаа юм.
.avif)
