Филиппиний нийслэл Манила хотын ойролцоо орших нэгэн тосгоны албаныхан халуун хумхаа өвчний дэгдэлтээс сэргийлж амьд, үхсэн ялгаагүй таван шумуул тутамд нэг песогийн урамшуулал олгохоор болжээ. Addition Hills нэртэй уг тосгоны иргэд лхагва гаргийн өглөөнөөс эхлэн хуванцар аяга, гялгар уутанд хийсэн шумуулаа барин урт дараалал зогсож эхэлсэн байна. Нэг филиппин песо 1.7 америк центтэй тэнцдэг юм.
Албаныхны тооцоогоор зөвхөн өнгөрсөн нэгдүгээр сард гэхэд Филиппинд халуун хумхаагийн 28 мянган тохиолдол бүртгэгдсэн нь өмнөх оны мөн үеийнхээс бараг 40 хувиар өссөн үзүүлэлт гэнэ.
Ялангуяа Филиппиний есөн бүс нутагт хумхаагийн дэгдэлт газар авах аюултай байгаа аж. Тус улсын хамгийн их хүнтэй хот болох Кесонд шинэ он гарсаар хумхаагаар нас барсан хүний тоо аравд хүрсэн тул өнгөрсөн бямба гарагт хумхаа өвчний дэгдэлт гарсныг албан ёсоор зарлаж, Филиппиний Эрүүл мэндийн яамнаас тус хотод эрүүл ахуйн онц байдал тогтоогоод байна.
Гэхдээ яамны зүгээс Addition Hills тосгоны урамшуулал олгох хөтөлбөрийг хэдий буруушаахгүй ч бас дэмжихгүй гэжээ. Яамны хэвлэлийн төлөөлөгч “Иргэдийг үнэхээр шагнаж урамшуулмаар байвал нэн тэргүүнд цэвэрч нямбай байдлыг нь дэмжиж, шагнах хэрэгтэй байна. Цэвэр цэмцгэр байдлыг эрхэмлээгүйгээс болж халдварт өвчин тархдаг шүү дээ” хэмээн анхааруулсан байна.
.avif)
