Дөнгөж үүрэгт ажилдаа ороод байгаа АНУ-ын Ерөнхийлөгч Дональд Трамп Орос-Украины дайныг даруй эцэслэ, үгүй бол эдийн засгийн дарамт шахалтад өртөхдөө бэлэн бай гэж ОХУ-ын Ерөнхийлөгч Владимир Путинд хатуу анхааруулсан. Харин энэ мэдэгдлийн хариуд Путин Трамптай уулзахад бэлэн байна, Украины асуудлаар хэлэлцээ хийе, нүүр тулан ярилцъя гэжээ.
Тэрээр Оросын төрийн төв телевизийн сэтгүүлчийн асуултад хариулахдаа “Америкийн шинэхэн Ерөнхийлөгчийн хамтран ажиллахад бэлэн байна гэсэн байр суурийг хүндэтгэж байна. Бид яриа хэлэлцээнд үргэлж бэлэн” гэсэн байна.
Путин мөн Трамптай харилцах харилцаагаа “цэвэр ажил хэргийн, бодит байдалд тулгуурласан, итгэж болохуйц” хэмээн тодорхойлжээ. Харин Трампын эдийн засгийн дарам үзүүлнэ гэсэн сүрдүүлгийг сүйдтэй хүлээж авахгүй байгаагаа илэрхийлээд энэ нь Орос, Америкийн хэн хэнд нь ашиггүй, газрын тосны үнэ хямдарлаа гэхэд бүгдэд хохиролтой гэдгийг Трамп мэдэж байгаа гэсэн байна.
Трамп Путинд хатуу анхааруулга өгөхөөс гадна Украины Ерөнхийлөгч Зеленськийг мөн хэлэлцээрийн ширээний ард суухдаа бэлэн байж, шаардлагатай гэвэл буулт хийх цаг ирснийг сануулсан юм. Тэрээр пүрэв гарагт Fox News сувагт өгсөн ярилцлагадаа Зеленськийг “цэвэр ариун хүн биш”, “Дайн дэгдсэнд тэр ч бас буруутай” гэсэн юм.
.avif)
