АНУ-ын Ерөнхийлөгч Дональд Трамп өнгөрсөн 15 сарын хугацаанд тонн орчим бөмбөг, пуужинд өртөж, бараг бүхлээрээ сүйдээд байгаа Газын зурвасыг цэвэрлэхийн тулд иргэдийг нь Египет, Иорданы нутаг руу нүүлгэн шилжүүлэх санал гаргажээ. Иорданы хаан Абдуллатай энэ талаар хэдийнээ утсаар ярилцсан хэмээсэн тэрээр 1.5 гаруй палестин хүний хувь заяаг цаашид сайн сайхан болоосой гэж хүсвэл хөрш зэргэлдээ Арабын орнууд л тусламжийн гараа сунгах хэрэгтэй байна, тэр дундаа Иордан болон Египетийн эрх баригчид палестинчуудын өмнө онцгой үүрэг хариуцлага хүлээх ёстой гэж онцолсон байна. “Газын зурвас бүхлээрээ нуранги, балгас болсон. Сэргээн босгохын тулд иргэдийг нь нүүлгэн шилжүүлэхэд туслаач гэж би Иорданы хаантай ярилцлаа. Өнөө маргаашгүй Египетийн Ерөнхийлөгчтэй ярилцана. Энэ шийдэл түр зуурын ч байж мэднэ, урт хугацааных ч байх магадлалтай” гэж тэрээр ярьжээ. НҮБ-ын тооцоогоор Газын зурвасын нийт барилга байшингийн 60 хувь ашиглах аргагүй болсон юм уу, бүрэн сүйдэж үгүй болжээ. Газын зурвасыг хяналтандаа байлгаж байгаа “Хамас” бүлэглэл палестинчуудыг эх нутгаас нь холдуулах гэсэн ямар ч шийдвэрийг дэмжихгүйгээ илэрхийлээд байна.
Газын зурвас 2.3 сая оршин суугчтай. Харин бүх Палестины нутгаас олон зуун мянган хүн Арабын орнууд руу хэдийнээ дайжин дүрвээд байгаа юм. Зөвхөн Иордан улсын жишээн дээр гэхэд 1948 онд Изриаль улс байгуулагдсанаас хойш дайжиж дүрвэн, цагаачилж очсон палестинчуудын үр удам өдгөө 2.4 саяд хүрээд байгаа бол Египетийн эрх баригчид Израиль-“Хамас”-ын одоогийн зөрчил 2023 онд хурцадсанаас хойш Газын зурвасаас дүрвэгчдийг олноор нь хүлээж авахгүй гэсэн хатуу байр суурьтай байгаа билээ. Тиймээс Трампын санал бодит ажил хэрэг болох боломж тун бага юм.
.avif)
