Украины дайныг эцэслэх эсуудлаар Саудын Арабад уулзалдсан Орос, Америкийн албаныхан дайн дууссаны дараа өөрсдийнх нь улс оронд эдийн засаг, хөрөнгө оруулалтын ямар давуу тал, боломжууд гарах вэ, тэр болгоныг ашиглахаар тохиролцлоо. Энэ нь Вашингтоны Москвад хандах уламжлалт байр суурийг өөрчилсөн явдал боллоо гэж ажиглагчид үзэж байна.
Флорида дахь Мар-а-Лаго эдлэндээ зарласан хэвлэлийн бага хурлын үеэр Трамп яриа хэлэлцээрт уригдаагүйдээ сэтгэл дундуур байна хэмээсэн Украины Ерөнхийлөгч Володимир Зеленськийн үгэнд дурамжхан байгаагаа илэрхийлээд, украинчууд хэрэв өөрсдөө хүссэн бол энхийн яриа хэлэлцээнд оролцох боломж нь нээлттэй байсан гэжээ. Тэр бүү хэл Украиныг дайнд буруутгасан өнгө аястайгаар “Уригдсангүй гэж гомдол мэдүүлээд хэрэггүй. Гурван жилийн өмнө ч та нарт боломж байсан шүү дээ. Анхнаасаа энэ дайныг эхлүүлэхгүй байх боломж нь та нарт байсан” гэсэн байна. Мөн Украинд Америкийн батлан хамгаалах салбар одоог хүртэлх хугацаанд хэр их тусламж туслалцаа үзүүлснийг сайн мэдэхгүй байна, нарийн зардал тооцоо нь ил биш байна хэмээн дургүйцлээ илэрхийлжээ.
Саудын Арабын нийслэл Эр-Рияд хотын Дирия ордонд болсон дээрх уулзалт Орос-Америкийн дунд хийгдсэн гурван жилийн дараах анхны дээд хэмжээний яриа хэлэлцээ юм. Уулзалтын дараа Америкийн Төрийн нарийн бичгийн дарга Марко Рубио хоёр улс тал талаасаа Украины дайныг эцэслэх асуудлыг хариуцсан тусгай хороо байгуулахаар болсныг зарлажээ. Тэгэхдээ тэрхүү тусгай хороод нь “дайн самуун, зөрчил тэмцлийг амжилттайгаар дуусгасны дараа бий болох эдийн засгийн боломжуудыг хэрхэн ашиглах талаар” мөн шат дараатайгаар хэлэлцэж зөвлөлдөнө, Вашингтоны Европ дахь холбоотнуудад энэ талаар хэдийнээ мэдээлээд байгаа гэсэн байна. Харин Европын холбооны гадаад бодлогын зөвлөх Кая Каллас Рубиод хандан оруулсан постондоо “Орос биднийг хагалан бутаргахыг л бодно. Урхинд нь орохгүй байцгаая. Америк орон оросуудтай хамтран ажиллаж, энхийг тогтоож болно. Гэхдээ Украины хувь заяаг нэн тэргүүнд бодолцож үзэхийг хүсье” гэжээ.
.avif)
