Улс орондоо цэргийн онц байдал зарласан ч бүтэлгүйтэж, өдгөө үүрэгт ажлаасаа түр чөлөөлөгдсөн нэртэй импичментэд өртөөд байгаа БНСУ-ын Ерөнхийлөгч Юн Сок Ёлийн жилийн цалин төрийн албан хаагчдын цалин нэмэгдэж байгаа шинэ хуулийн дагуу гурван хувиар нэмэгдэж, жилийн 263 сая вон буюу 179 мянган ам.доллар болжээ. Импичмент буюу өндөр дээд албаны хариуцлага алдсаныхаа хариуд шийтгэл хүлээх зэмлэлийг албан ёсоор хүртсэн ч түүнийг мөрдөн шалгах, баривчлах хэд хэдэн удаагийн оролдлого бүтэлгүйтээд байгаа юм.
Ерөнхийлөгчийн цалин нэмэгдсэн мэдээнд уурссан солонгосчууд сошиал медиагаар бухимдлаа илэрхийлж, хөдөлмөрийн хөлсний доод хэмжээ 1.7 хувиар өссөн байхад улс орондоо цэргийн дэглэм тогтоохыг санаархсан Ерөнхийлөгчийн цалин гурван хувиар нэмэгдсэнийг эсэргүүцэн ахин жагсаал цуглаан зохион байгуулахаа илэрхийлсээр байна.
Хамгийн сүүлд энэ сарын 7-ны өдөр шүүхээс Юн Сок Ёлийг баривчлах шийдвэр гарсан ч албаныхныг ажлаа гүйцэлдүүлж амжаагүй байхад шүүхийн шийдвэрийн хугацаа дуусгавар болсон аж. Харин дараагийн шүүхийн шийдвэрийг гүйцэтгэхдээ холбогдох албаныхан цагдаагийн тусламж авахаар хөөцөлдөж байгаа гэсэн мэдээ байна.
Ерөнхийлөгчийн үүрэг гүйцэтгэгчээр түр томилогдоод байсан Хан Дак Сү мөн парламентаас импичментэд өртөж, үүрэгт ажлаа үргэлжлүүлэх боломжгүй болсон юм. Түүний цалин мөн гурван хувиар нэмэгдэж, жилийн 204 сая вон буюу 138 мянган ам.доллар болжээ. Сонирхуулахад Өмнөд Солонгосын Ерөнхийлөгчийн цалинтай харьцуулахад Америкийн Ерөнхийлөгч жилийн 400 мянга, Их Британийн Ерөнхий сайд 209 мянган ам.долларын цалин авдаг юм.
.avif)
