Украины Ерөнхийлөгч Володимир Зеленський хэрэв АНУ, Европын харилцаа хөрч, Вашингтоны дэмжлэг үгүй болбол ОХУ бүх НАТО-гийн эсрэг дайсагнах нь гарцаагүй хэмээгээд Оросын арми ахин нэг Европын орныг эзлэхээр зэхэж байгааг нотлох тусгай албадын мэдээлэлтэй танилцсан гэдгээ хэллээ. Тэрээр өчигдөр NBC телевизийн “Meet the Press” нэвтрүүлэгт өгсөн ярилцлагадаа Парис хотод удахгүй эхлэх Украины асуудлаарх Европын тэргүүн нарын шуурхай чуулган болон Саудын Арабын нутагт хийгдэхээр яригдаж байгаа Орос, Америкийн дээд хэмжээний энхийн хэлэлцээний талаар санал сэтгэгдлээ хуваалцсан байна.
Зеленський Путиний дараагийн байг Польш юм уу, Литви байна хэмээгээд “Оросын арми энэ зун дайралтаа эхлэх байх. Беларусын нутагт 150 мянган цэрэг бэлдэж байгаа гэсэн мэдээ байна. Путин үүнийгээ ердөө цэргийн сургуулилалт гэх нь гарцаагүй. Гэхдээ энэ нь ямархуу сүрдүүлэг болохыг бид харах вий. Гурван жилийн өмнө Украиныг эзлэхдээ тэр бэлгэдлийн шинжтэй цэргийн сургуулилалтаас л хамаг цэргийн ажиллагаагаа эхлүүлсэн шүү дээ” гэжээ.
Тэрээр мөн АНУ-ын Ерөнхийлөгч Дональд Трампыг Путинтэй тохиролцоо хийж чадна гэдэгт итгэлтэй хэвээр байгаа авч хэлэлцээрийн ширээнд Украиныг суулгаагүй тохиолдолд ямар ч яриа хэлэлцээг хүлээн зөвшөөрөхгүй гэсэн байна. Өнгөрсөн долоо хоногт Америкийн Дэд ерөнхийлөгч Ж.Д.Вэнс Мюнхенд болсон Аюулгүй байдлын асуудлаарх олон улсын чуулганаар европчууд өөрсдөө “хар толгойгоо хариуцах цаг ирсэн” гэсэн утгатай үг хэлсэн нь, Трамп хэзээ нэг өдөр Украин улс “Оросынх болж ч магадгүй” гэсэн нь урмыг нь ихэд хугалсан талаар ч Зеленський мөн ам нээжээ.
.avif)
