Францын Ерөнхийлөгч Эмманюэль Макрон Парис хотноо болж буй Хиймэл оюун ухааны дээд хэмжээний чуулганыг угтан хиймэл оюун ухаанаар бүтээсэн deepfake гэгдэх хуурамч бичлэг, зургууд хэчнээн аюултай болохыг сануулж, олон нийтэд анхааруулга болгох үүднээс өөрийг нь элдэвлэж, элэглэсэн бичлэгүүдийг эвлүүлэн сошиал медиа хуудсуудаараа цацжээ. Тэдгээр бичлэг сүүлийн хэдэн сар Францын сошиал медиа хэрэглэгчдийн дунд ихэд түгээд байж.
Макрон өнгөрсөн аравдугаар сард “Variety” сэтгүүлд өгсөн ярилцлагадаа deepfake бичлэгийг нэг төрлийн хүчирхийлэл хэмээгээд хиймэл оюун ухааны хэрэглээг хэвийн гэж үзэх нь хуурамч мэдээлэл газар авахад хүргэнэ гэж анхааруулсан байна.
Гэхдээ ухаалгаар ашиглаж хэвшвэл, хууль журмын дагуу хатуу хяналт тогтоож чадвал хиймэл оюун ухаан олон давуу талтайг мөн дурджээ.
Өчигдөр эхэлсэн Хиймэл оюун ухааны дээд хэмжээний чуулган хоёр хоног үргэлжлэх бөгөөд олон орны өндөр дээд албаныхан, технологийн салбарын мэргэжилтнүүд болон судлаач, эрдэмтэд нийгэм, улс төр, хүрээлэн буй орчинд үзүүлэх хиймэл оюун ухааны нөлөө тусгалын талаар хэлэлцэхээр цуглаад байна. Чуулганы үеэр мэргэжилтнүүд хиймэл оюун ухааны зорилго, ёс суртахууны хариуцлага зэргийг тусгасан дэлхийн хэмжээний тунхаг батлахыг зорьж байгаа аж.
.avif)
