Энэ даваа гарагт Ганга мөрний эрэгт эхэлсэн Кумб Мэла нэртэй хиндү шашны эргэл мөргөл нь дэлхий дээрх хамгийн олон хүн нэг дор цугладаг, бүр сансраас хүртэл харагддаг хамгийн том цугларалт юм. Хиндү шашны тооллоор 12 жилд нэг удаа болдог уг баяр энэ жил бүр ч онцгой өргөн дэлгэр болж байна. Учир нь Маха Кумб Мэла гэгддэг, 144 жилд нэг тохиох их мөргөл нь энэ жил тохиож байгаа аж.
Энэтхэгийн хойд хэсэгт орших Уттар Прадеш мужийн Праяграж хотод болдог энэ баяр 45 хоног үргэлжилдэг бөгөөд энэ жил нийт 400 сая гаруй хүн уг хотыг зорин очно гэсэн тооцоо байна.
Хиндү шашинтнуудад хамгийн ариун гэгдэх гурван мөрөн Ганга, Ямуна болон туульсын Сарасвати мөрний гурвуулангийнх нь нэгэн цэгт ирж цутгадаг газар хотын хажууханд оршдог тул Праяграж хотыг энэтхэгчүүд бүр эрт дээр цагаасаа сүслэн дээдэлж иржээ. Кумб Мэлагийн үеэр Праягражид ирж мөргөн, гурван мөрний нэгдэн нийлдэг их цутгаланд амьдралдаа ядаж нэг удаа биеэ ариусгавал энэ насны нүгэл хилэнцээсээ сална, ахин дахин эргэж төрөх мөнхийн зовлонт хүлээснээс ангижирна гэж хиндү шашинтнууд үздэг байна.
12 жилийн өмнөхөөс ялгаатай нь энэ жилийн Кумб Мэла ихэд технологожжээ. 40 ам км доторх бүх л сүм хийд, усан ариусал хийж болох газрууд, хоолны мухлаг, эмнэлгийн тусламж авах асар майхан, олны дунд төөрч алга болсон хүнээ олох цэг гээд тал талын мэдээлэл агуулсан аппликэйшн бий болж; хиймэл оюун ухаанд суурилсан 11 хэлийн орчуулагчтай chatbot, WhatsApp-ийн тусгай хаяг сүсэгтэн олон болон аялагч жуулчдад үйлчилж байгаа гэнэ. Мөн аюулгүй байдлыг хангах, цугласан олны шилжилт хөдөлгөөнийг тандах хэдэн мянган хяналтын камер нэмэгдсэн бол эртний хиндү үлгэр домгийн үүх түүхүүдийг амилуулах 2000 гаруй дронтой гэрлийн шоу үндсэн хөтөлбөрт нь багтсан байна.
Энэ жилийн Кумб Мэла ирэх хоёрдугаар сарын 26 хүртэл үргэлжилнэ.
.avif)
