Италийн хамгийн том сүлжээтэй мафи гэгддэг “Ндрангета”-тай холбоотой гэх 24 хүнийг тус улсын цагдаа нар нутгийн хойд хэсгээс баривчилсан байна. Тэдний дунд шоронд ял эдэлж байгаа мафийн гишүүдийг гадаад ертөнцтэй, тэр дундаа бусад гишүүдтэй нь холбож өгч байсан 57 настай Анна Донелли гэх гэлэнмааг мөн баривчлан саатуулжээ. Түүнчлэн дээрх мафитай холбоотой хоёр ч улстөрчийг нутгийн өмнөд хэсгээс баривчилж, нийт 1.8 сая еврогийн үнэ хүрэх эд хөрөнгийг нь битүүмжилсэн байна. Гэхдээ одоогоор тэдний нэрийг нууцалж байгаа аж.
“Ндрангета” нь Италийн хамгийн том мафиас гадна Европын хамгийн том, хамгийн нэр нөлөөтэй төдийгүй дэлхийн хамгийн хөрөнгө чинээтэй зохион байгуулалттай гэмт хэргийн бүлэглэлийн нэг юм. Баривчлагдсан дээрх 24 хүний дунд бусдыг айлган сүрдүүлсэн, галт зэвсэг эзэмшсэн, мансууруулах бодис худалдсан, тээвэрлэсэн, хулгайн эд зүйлс зарж борлуулсан зэрэг гэмт хэрэгтнүүд байна. Харин Анна гэлэнмаагийн хувьд 2010 оноос Миланы Сан Витторегийн гянданд сайн дурын ажилтан хийсэн агаад дүр байдлаа ашиглан олон ч гэмт хэрэгтний дунд зуучлагч хийж байжээ.
.avif)
