Энэ нь эртний Египетийн фараоны бунхныг илрүүлсэн 100 гаруй жилийн дараах анхны явдал болж байна. Хамгийн сүүлд эртний фараоны булш бунхныг 1922 онд олж илрүүлсэн бөгөөд Тутанхамон хааны бунхныг бүрэн бүтнээр нь нээн судалсан тэр явдлыг археологийн ухааны түүхэн дэх хамгийн гайхамшигтай үйл хэргийн нэг гэж үздэг билээ. Тиймээс одоогоос 3500 гаруй жилийн өмнө амьдарч байсан, эртний Египетийн 18 дугаар гүрний хаан хоёрдугаар Тутмосын бунхан олдсон явдал нь египет судлалаас гадна археологи, түүхийн салбарт ихээхэн дуулиантай мэдээ гэгдэж байна.
Бүтэн 12 жил Тутмос хааны бунхныг хайсан Британи-Египетийн хамтарсан эрэл хайгуул, судалгааны баг Египетийн Луксор хотын ойролцоох Тебан Некрополисын баруун хөндий гэгдэх газраас дээрх нээлтийг хийжээ.
Эрдэмтэд өмнө нь 18 дугаар гүрний хаадыг Хаадын хөндийтэй ойролцоо буюу сүүлд олдсон газраас нь хоёр гаруй км-ийн зайд хайж байж. Харин II Тутмосыг сурвалжит эмэгтэйчүүдийн дунд бунхалсан байсныг ийнхүү санамсаргүй олжээ. Ингэснээр 18 дугаар гүрний бүх хаадын бунхан гүйцэд олдоод байна. Хоёрдугаар Тутмосын занданшуулсан шарилыг эрдэмтэд тэртээ хоёр зууны өмнө илрүүлээд байсан ч анхлан бунхалсан газар нь олдолгүй өдий хүрсэн аж. Хааны шарил өдгөө Каир хот дахь Египетийн соёл иргэншлийн Үндэсний музейд хадгалагддаг байна. II Тутмосыг НТӨ 1493-1479 онд, 13 жил хаанчилсан гэж үздэг юм. Түүнийг олон нийт эртний Египетийн хамгийн агуу удирдагчдын нэг Хатшепсут хатны нөхөр гэдгээр нь илүүтэй мэднэ.
Бунхныг олсон судлаачдын мэдээлснээр бунхны адар тааз ихэс дээдсийн хээ дүрс, гоёл чимэглэлээр дүүрэн, хэдэн мянганы өмнөх хөх будаг нь ч янзаараа байгаа гэнэ.
Гэхдээ булш бунхан тоногчдын гараар орсон гэхээсээ үер усанд автуулахгүйн үүднээс доторхыг нь зориуд хоосолсон болов уу гэмээр эд өлгийн зүйлс тун цөөхөн олдсон байна. Бунхны доторхыг судлах, шат дараатай нарийн цэвэрлэх ажил хэдэн ч сар үргэлжилж мэдэх аж.
.avif)
