Украины Ерөнхийлөгч Володимир Зеленський Оросын Курскийн нутгаас олзлогдсон Хойд Солонгосын хоёр цэргийг Орост олзлогдоод байгаа украин цэргүүдээр солилцох санал тавьжээ. Гэхдээ нутаг буцах хүсэлгүй солонгос цэргүүдэд “хамтран ажиллах санал” тавьж, хэрэв дайны үнэн бодит байдлыг солонгос хэлээр түгээхэд оролцвол илүү эрх чөлөөтэй амьдрал санал болгосон гэнэ.
Украины армиас мэдээлснээр олзны солонгос цэргүүд дайны талаар ямар ч ойлголтгүй байсны дээр Оросын нутагт зөвхөн сургуулилалтад оролцоно гэж бодож иртэл жинхэнэ тулаанд дайчлагдсан байж. Олзлогдсон хоёр цэргийн нэг нь Тува улсын иргэн гэх хуурамч нэртэй Оросын армийн бичиг баримттай байсан бол нөгөө нь ямар ч баримт бичиггүй явсан байна. Хоёр цэрэгт эмнэлгийн тусламж үзүүлж, тухтай орчинд байлгаж байгаагаа Украины тал мөн мэдэгджээ.
Өмнөд Солонгосын тусгай албадын сүүлд мэдээлснээр Оросын армид хүч нэмсэн Хойд Солонгосын цэргүүдээс 300 гаруй нь амь үрэгдэж, 2700 гаруй нь шархдаад байна.
Оросын тал Хойд Солонгосын армитай хамтарч байгаагаа үгүйсгээгүй бөгөөд ямар улстай холбоотон болох нь өөрсдийнх нь дур гэж мэдэгдсээр байгаа юм.
.avif)
