АНУ-аас НҮБ-ын дэргэд суугаа Элчин сайд, байнгын төлөөлөгчийн орлогч Дороти Камилл НҮБ-ын Аюулгүйн зөвлөлд үг хэлэхдээ ийн мэдэгдлээ. Түүний анхааруулснаар ОХУ-ын арми 2022 оны хоёрдугаар сард Украин руу халдсанаас хойш Орос, Хойд Солонгосын цэрэг армийн болон дипломат харилцаа өмнөхөөсөө илүү гүнзгийрч, өдгөө Хойд Солонгосын 12 мянга гаруй цэрэг Украины нутагт оросуудтай мөр зэрэгцэн тулалдаж байгаагаас үзэхэд Умардын Зэвсэгт хүчин урьд байгаагүйгээрээ жинхэнэ тулааны талбарт туршлага хуримтлуулж байгаа нь баттай аж. Тиймээс ч урьд урьдынхаасаа илүү дайн байлдаан өдөөх ур чадвартай болсон, бодит туршлагаас гадна техник технологи, зэр зэвсгийн хангамж тал дээр ч нөөц бааз бий болгож, хөрш зэргэлдээ орнуудтайгаа дайтахад улам бүр бэлэн зэхээтэй болсоор байна гэж тэрээр онцолжээ.
Пёньяны албаныхан энэ даваа гарагт дундын тусгалт шинэ загварын баллистик пуужин амжилттай туршсанаа зарласан юм. Уг асуудлаар санал солилцохоор НҮБ-ын Аюулгүйн зөвлөлийн 15 улс өчигдөр хуралдсан аж. Хурлын үеэр Хойд Солонгосоос НҮБ-ын дэргэд суугаа Элчин сайд олон улс Америкийн үйлдэлд алагчлалтай ханддаг, Израилийн Газын зурваст явуулж байгаа цэргийн ажиллагааг нутаг дэвсгэрээ хамгаалсан үйлдэл гэх атлаа Хойд Солонгосын яг ижил үйлдлийг буруушаах нь зохисгүй хандлага хэмээн шүүмжилсэн бол Оросын төлөөлөгч Хойд Солонгосыг баллистик пуужин турших эрхтэй хэмээгээд Америк, Өмнөд Солонгос, Япон зэрэг орнууд Пёньяныг өдөөн хатгахгүй бол Хойд Солонгост зэвсэглэлээр хөөцөлдөх шаардлага байхгүй гэжээ.
.avif)
