Тус бүлэглэл өнгөрсөн сард батлагдсан гал зогсоох гэрээг Израилийн тал зөрчсөн гэсэн шалтгаанаар барьцаанд буй израиль иргэдийг суллахаа түр зогсоож байгаагаа зарлалаа. Гэхдээ Израилийн зүгээс яг ямар зөрчил гаргасныг одоогоор мэдэгдээгүй байна. Бүтэн 15 сар дайтсан “Хамас”, Израиль хоёр өнгөрсөн сард АНУ-ын Ерөнхийлөгч Дональд Трампыг тангараг өргөхөөс ердөө тав хоногийн өмнө гурван долоо хоногийн гал зогсоох тухай гэрээнд гарын үсэг зурсан билээ. Энэ хугацаанд Израилийн тал 1900 орчим палестин хоригдлыг, “Хамас” бүлэглэл 2023 оны аравдугаар сараас хойш барьцаанд байгаа хүмүүсээс 33-ыг нь суллахаар болсон юм. Одоогоор Израилийн 16 иргэн, Израилийн нутагт газар тариалангийн ажил эрхэлж байгаад баригдсан Тайландын таван иргэнийг “Хамас” суллаад байгаа бол Израилийн талаас 556 палестин хоригдлыг шилжүүлж өгөөд байна. Израилийн албаныхны тооцоогоор “Хамас”-ын барьцаанд одоо 73 хүн байгаа аж.
“Хамас”-ын дээрх мэдэгдлийн дараахан Дональд Трамп Газад хоригдож байгаа хүмүүсийг ирэх бямба гараг гэхэд суллахгүй бол гал зогсоох гэрээг тэр чигт нь цуцална, байдал улам хурцадна гэж хатуу сануулжээ. Барьцааны гурван хүнийг бямба гаргийн их үдэд суллах тов өмнө нь гараад байж. Мөн палестин дүрвэгчдийг хүлээж авахгүй гэвэл, Газын зурвасыг Америкийн мэдэлд шилжүүлж, сэргээн босголтод оролцохгүй гэвэл бүхий л хангамж, тусламжаа зогсооно гэж Иордан, Египетийн эрх баригчдад анхааруулсан байна.
.avif)
