Улс орноо Европын холбоонд элсүүлэх эсэх асуудлыг тодорхойгүй хугацаагаар хойш тавиад байгаа эрх баригчдынхаа шийдвэрийг эсэргүүцэн Гүржийн ард иргэд гурав дахь өдрөө нийтийг хамарсан жагсаал цуглаан зохион байгуулж, зарим газар бүр үймээн самуун дэгдээгээд байна. Гүржийн Ерөнхийлөгч Саломе Зурабишвили одоогийн парламентыг хууль бус хэмээгээд энэ сарын 14-нд парламентын ээлжит бус сонгууль зохион байгуулахаа зарлажээ. Сөрөг хүчнийг дэмжигч, барууны талыг баримтлагч тэрээр эрх баригч Гүржийн мөрөөдөл намыг өнгөрсөн аравдугаар сард болсон парламентын сонгуулиар хууль зөрчин ялалт байгуулсан, улс орноо барууны загвараар хөгжүүлэхийн оронд ОХУ-аас хараат байлгах гэлээ хэмээн шүүмжилсэн байна. Парламентад суудалтай болсон сөрөг хүчний дөрвөн нам, эвсэл мөн сонгуулийг шударга бус болсон гэж үзэж, нэр дэвшигчид нь шинэ гишүүний үнэмлэхээ гардаж авахаас татгалзаад байгаа аж.
Иргэдийн жагсаал цуглаантай зэрэгцэн Гүржийн нэр нөлөөтэй зарим хүн, тэр дундаа зохиолч, сэтгүүлчид олон нийтийн телевизийнхээ байрны гадаа цуглаж, үндэсний төв сувгаа эрх баригч намын суваг болсон, Оросыг сурталчлагч болсон хэмээн эсэргүүцлээ илэрхийлсэн байна.
Өчигдрийн байдлаар ганц Тбилис хотод гэхэд цагдаа нар 150 гаруй жагсагчийг баривчилжээ. Гүржийн бусад хотод ч ялгаагүй эрх баригчдаа эсэргүүцэгчдийн жагсаал цуглаан болж буй бөгөөд зарим газар нулимс асгаруулагч хий, резинэн сум ашигласан мэдээ байна.
.avif)
