Германы парламентын ээлжит бус сонгуульд Холбооны намууд гэгддэг Христийн ардчилсан холбоо, Христийн социал холбоо намын нэгдсэн эвсэл нийт сонгогчдын бараг 29 хувийн саналаар ялалт байгуулжээ. Харин хэт барууны үзэлт Alternative für Deutschland (AfD) нам хоёрт бичигдсэн нь урьд байгаагүй үзэгдэл болж байна. Цагаачлал, гэмт хэрэг, эрчим хүчний үнэ зэрэг асуудлыг мөрийн хөтөлбөртөө тусгаж, олон нийтийн унтууцал дургүйцлийг ашигласан гэгдэж байгаа тус нам сонгогчдын 21 хувийн санал авчээ. Энэ нь 2021 оны сонгуулиар авсан саналаа бараг хоёр дахин нэмж чадсан хэрэг гэнэ. AfD намын амжилтыг Трамп магтан сайшааж, “Америкийн ард түмэнтэй адил германчууд цагаачлалын эсрэг байгаагаа, эрчим хүчний үнийн өсөлтөд дургүйцэж байгаагаа илэрхийллээ. Германы түүхэнд агуу өдөр тохиолоо” гэжээ.
Харин Холбооны намуудыг тэргүүлэн энэ удаагийн сонгуульд оролцсон, Германы дараагийн Канцлер болох нь тодорхой болоод байгаа Христийн ардчилсан холбоо намын тэргүүн Фридрих Мерц Трампын мэдэгдлийг буруушаагаад “Трамп Европын хувь заяаг огт бодолцдоггүй гэдгээ үүгээрээ илэрхийллээ. Европчууд бид даруйхан хүчээ нэгтгэж, батлан хамгаалахын салбарт Америкаас хараат бус болох хэрэгтэй” гэсэн байна.
Герман улс эдийн засгийн цараагаараа дэлхийд гуравт бичигддэг бөгөөд бүх Европтоо бүхий л салбарт тэргүүлэгч орон юм. Одоогийн Канцлер Олаф Шольцийн тэргүүлсэн Засгийн газар өнгөрсөн арванхоёрдугаар сард итгэл хүлээлгэх эсэх Бундестагийн санал асуулгад унаснаар энэ удаагийн ээлжит бус сонгуулийг явуулахад хүрсэн билээ. Энэ нь Германы түүхэн дэх дөрөв дэх ээлжит бус сонгууль болж байна.
.avif)
