Израилийн Батлан хамгаалахын сайд Исраэль Кац ийн мэдэгдлээ. Тэрээр АНУ-ын Ерөнхийлөгч Дональд Трампын Газын зурвасыг бүрэн чөлөөлж байж, сэргээн босгох төлөвлөгөөг Израилийн Засгийн газар дэмжиж байна хэмээгээд “Газын иргэд хүссэнээрээ дүрвэж, цагаачилж болно. Ийм зүйл дэлхийн өнцөг булан бүрд одоо хэвийн үзэгдэл болсон” гэжээ. Мөн Израилийн Зэвсэгт хүчин “сайн дураараа” дүрвэж гарах палестинчуудад “туслах” төлөвлөгөө боловсруулж эхэлсэн гэсэн байна. Харин тэр олон дүрвэгчийг хэн хүлээж авах вэ гэсэн сэтгүүлчийн асуултад “Газын зурваст явуулсан Израилийн тусгай ажиллагааг эсэргүүцэж, манай Засгийн газрыг удаа дараа гүтгэсэн Испани, Ирланд, Норвеги зэрэг орнууд” гэж хариулсан байна.
Олон улс Трампын төлөвлөгөөг эсэргүүцэж байр сууриа илэрхийлсээр байгаа бол хамгийн сүүлд Иран, Испани, Малайз, Их Британи, Өмнөд Солонгос, Хятадын эрх баригчид тусгайлан мэдэгдэл гаргаж Газын зурвасыг болон Палестины ард иргэдийг улс төрийн барьцаа, мөрий болгон ашиглахыг тэвчихгүй гэжээ. Харин Израилийн Ерөнхий сайд Биньямин Нэтаньяху Трампын саналыг “гайхалтай” хэмээн тодорхойлоод төлөвлөгөөг хэрэгжүүлэхэд болохгүй юмгүй, Газын зурвасаас хэн ч гарч болно, энд хэн ч эргэж ирээд суурьшиж болно, хамгийн гол нь бүх зүйлийг нь сэргээн босгох зайлшгүй шаардлага тулгараад байна гэж ярьсан байна.
2023 оны аравдугаар сарын 7-ны өдөр “Хамас” бүлэглэл Израилийн нутаг руу халдаж, 1200 орчим хүнийг хөнөөн, 251 хүнийг барьцаалсны хариуд Израилийн Зэвсэгт хүчин Газын зурваст цэргийн тусгай ажиллагаа явуулсан билээ. Бүтэн 15 сар үргэлжилсэн Израиль-“Хамас”-ын дайнд 48 мянга гаруй хүн амь үрэгдэж, 112 мянга орчим хүн шархадсан гэж “Хамас”-ын талаас мэдэгдээд байгаа. Харин олон улсын шинжээчдийн дүн мэдээгээр Газын зурвас дахь нийт барилга байшингийн бараг 70 хувь бүрэн сүйдээд байна.
.avif)
