Алан хядах “Хамас” бүлэглэлтэй тэмцэх нэрийдлээр Газын зурваст тасралтгүй 14 дэх сардаа цэргийн тусгай ажиллагаа явуулж байгаа Израилийн төр засгийг олон улсын хуулиар геноцид буюу зохион байгуулалттайгаар хоморголон устгах ажиллагаа, хядлага үйлдэж байна хэмээн хүний эрхийн “Эмнести интернэшнл” байгууллага мэдэгдлээ. Хүний эрхийн томоохон байгууллагуудаас анх удаа ийм төрлийн мэдэгдэл хийж байгаа нь энэ юм. Нийт 296 хуудас болсон дүн мэдээндээ тус байгууллага Газын зурвасын одоогийн хямрал даамжирсан өнгөрсөн 2023 оны аравдугаар сараас энэ оны долдугаар сар хүртэлх халдлага, дэлбэрэлтийн үр дагавар, хор хохирлын мэдээллийг нэгтгэн ийм дүгнэлтэд хүрчээ. Мэдэгдэлд Израиль улс Газын зурвасын “2.3 сая хүнийг амьдын тамд унагасан” хэмээгээд хэдийгээр аравдугаар сарын 7-ны өдөр “Хамас”-ын Израилийн иргэдийн эсрэг өдүүлсэн гэмт хэрэг балмад хэрцгий байсан ч энэ нь “Газын иргэдийг хоморголон устгаж буй хэргийн зөвтгөл болохгүй” гэж онцолсон байна. Тус байгууллагын тооцоогоор Газын иргэдийн 90 хувь нь хүн аж төрөхөд ямар ч тохиромжгүй газар арайхийн амь зууж, өдөр бүрийг айдас түгшүүртэй, өлөн зэлмүүн өнгөрөөж байгаа нь Газын хямралыг 21 дүгээр зууны анхны геноцид гэж үзэхэд хангалттай том шалтгаан аж. Хэдий дайн дажны нөхцөл байдалтай байгаа авч Израиль улс эзэрхийлэгч талын хувьд энгийн иргэдэд хүмүүнлэгийн тусламж хүргэх үүрэг хүлээх ёстой. Гэтэл өнгөрсөн есдүгээр сар хүртэл өдөрт дунджаар 100 орчим байсан тусламжийн бараа, хоол хүнс хүргэх ачааны тэрэгний тоо арваннэгдүгээр сарын дунд гэхэд 50 хүрэхтэй үгүйтэй болтлоо буурсан нь л дангаараа гэмт хэрэгт тооцогдох үйлдэл гэнэ. Эмнести Интернэшнл байгууллага түүхэндээ анх удаа дуусгавар болоогүй байгаа дайн дажин, зэвсэгт зөрчлийн талаар ийм дүгнэлт гаргасан нь энэ юм.
Хамгийн сүүлийн мэдээгээр Хан Юнис хотын ойролцоох дүрвэгсдийн хуарангийн ойр орчимд болсон дэлбэрэлтэд 47 хүн амь үрэгдсэний 21 нь энгийн иргэн, тэр дундаа дөрөв нь бага насны хүүхэд байжээ.
.avif)
