.avif)
Хилийн зөрчил, газар нутгийн маргаанаас болж 2020 оноос хойш шууд нислэгээ зогсоогоод байсан Энэтхэг, Хятадын албаныхан таван жилийн дараа шууд нислэгээ сэргээхээр болжээ. Энэтхэгийн Гадаад хэргийн яамны Төрийн нарийн бичгийн дарга Викрам Мисри энэ өдрүүдэд Бээжинд айлчилж буй бөгөөд энэ нь хоёр улсын хилийн маргаан хурцдаж, харилцаа муудсанаас хойш хийгдэж байгаа хамгийн өндөр дээд хэмжээний цөөн хэдэн дипломат айлчлалын нэг болж байна.
Дэлхийн хамгийн олон хүнтэй хоёр улсын хооронд 2020 оноос өмнө сард 500 орчим шууд нислэг хийгдэж байжээ.
Харин хилийн зөрчлөөр Энэтхэгийн 20 гаруй, Хятадын дөрвөн цэрэг амиа алдсанаас хойш шууд нислэг зогсохоос гадна бизнес, хөрөнгө оруулалтын салбарт ч хоёр улсын харилцаа муудсан юм. Энэтхэгийн Засгийн газар гэхэд Хятадын олон зуун аппликейшнийг, түүний дотор TikTok-ийг хориглосон билээ.
Хоёр улс Хималайн нуруунд нийт 10 бүс нутагт газар нутгийн маргаантай байгаа юм.
.avif)
