Трампын Засгийн газрын зардлыг хянахаар байгуулагдсан Төрийн бүтээмжийг хянах яам нэртэй шинэ агентлагийг даргалж байгаа Элон Маскийг эсэргүүцсэн иргэд түүний эзэмшдэг “Тесла” автомашины Нью-Йорк, Сиэтл, Канзас зэрэг хот дахь борлуулалтын цэг, салбаруудын гадаа дургүйцлээ илэрхийлэн жагссан байна. Маск Трампын сонгуулийн кампанит ажилд 200 сая гаруй ам.доллар зарцуулахаас эхлээд шинээр байгуулагдсан агентлагаараа дамжуулан одоогоор бараг 10 мянга хүнийг халаад байгаа, 85 мянган ажлын байрыг цомхотголд оруулсан зэрэг шүүмжлэлд өртөөд байгаа юм. Өнгөрсөн баасан гарагт гэхэд эрчим хүч, ахмад дайчны халамж, хөдөө аж ахуй, эрүүл мэнд зэрэг салбарт жил ч хүрэлгүй хугацаанд ажиллаж байсан залуусыг цомхотгосон гэсэн мэдээ байна.
Харин “Тесла”-д хөрөнгө оруулагчид Маскийг эдийн засгийн алдагдал тооцолгүй хэт улстөржиж байна хэмээн дургүйцэх болжээ. Маскийн хэт барууны үзэл нөлөөлсөн үгүйг мэдэх аргагүй ч тус компанийн борлуулалт өнгөрсөн онд анх удаа буурсан гэсэн тооцоо байна.
.avif)
