ХӨСҮТ болон НЭМҮТ-өөс томуу, томуу төст өвчлөлийн цаг үеийн нөхцөл байдлын талаар мэдээлэл хийлээ. Энэ үеэр ЭХЭМҮТ-ийн Хүүхдийн эмнэлгийн Нярайн эмгэг судлалын тасгийн эрхлэгч Г.Батцэнгэл “Манай тасагт өнөөдрийн байдлаар 76 хүүхэд эмчлүүлж байна. Үүнээс 22 нярай амьсгалын замын эмгэгтэй, уушгины хатгалгаа болон түүний хүндрэлийн улмаас эмчлүүлж байгаа. Мөн 22 хүүхдийн 15 нь ямар нэгэн байдлаар хүчилтөрөгчийн эмчилгээ шаардлагатай, амьсгалын дутмагшлын шинжүүд илэрсэн. Эдгээр хүүхдийн 75 хувь нь дутуу буюу бага жинтэй, 37 долоо хоногоос өмнө төрсөн.
Нярай хүүхдэд насанд хүрсэн хүмүүс шиг шууд ханиах, найтаах зэргээр амьсгалын замын өвчлөлийн шинж тэмдэг илэрдэггүй.
Тухайн хүүхэд хөхөндөө сул, биеийн халуун хэвийн биш болох, унтаарах, хөхсөнийхөө дараа сүүгээрээ бөөлжих гэх мэт ерөнхий шинж тэмдэг илэрч байгаа. Ерөнхий шинж тэмдгүүд даамжраад, аажимдаа амьсгаадах, ялангуяа хөхөөр хооллох явцад хөхөж чадахгүй, амьсгал олшрох, хамрын амьсгал саадтай болох, цээж хонхолзох, зайнаас шуугьж сонсогдох гэсэн эмнэлзүйн шинж давамгай илэрч байна. Дур мэдэж эм хэрэглэх нь хүүхдийн биеийн байдал хүндрэх нэг шалтгаан болж байна. Эцэг, эхчүүдэд фэйсбүүк групп нээж, бие биедээ хувьчилсан байдлаар зөвлөгөө өгөх нь эрсдэл дагуулж байгаа. Миний хүүхдэд эм тохирч байсан, нас, төрсөн он нь ижил юм чинь танай хүүхдэд ч энэ эм тохиромжтой гэх мэтээр зөвлөдөг. Ах, эгчид нь ийм тунгаар уулгаж байсан юм чинь нярайдаа тунг нь хувааж өгөх зэргээр дур мэдэн эм, эмийн бэлдмэл хэрэглэж, хүүхдийн биеийн байдал хүндрэх нөхцөл үүсгэж буй асуудлууд бий. Түүнчлэн дотоод орчны агаарын бохирдол энэ өвчлөлд нөлөөлж байна. Энэ нь дам тамхидалтад өртөх буюу ээж, аав хоёр нь тамхи татдаг бол дотоод орчны агаарын чанар буурдагтай холбоотойгоор өвчлөл хүндэрч байна” гэв.
.avif)
