БНСУ-ын Ерөнхийлөгч Юн Сок Ёль өчигдөр орой гэнэт зарласан цэргийн онц байдал тогтоох шийдвэрээ цуцлахаар болжээ. Орон нутгийн цагаар 23:00 цагийн үед гаргасан гэнэтийн шийдвэрт нь цочирдож, уурсаж бухимдсан олон парламентын ордны гадаа цуглаж, тэр дундаа парламентын гишүүд нь цэрэг цагдаагийн хамгаалалт, хаалт хашаа даван ордондоо орж санал хурааснаар 300 гишүүнээс нь санал хураалтад оролцсон нийт 190 гишүүний 100 хувийн саналаар Ерөнхийлөгчийн шийдвэрийг хүчингүйд тооцохоор болсон юм.
Юн Сок Ёль Ерөнхийлөгчийг засгийн эрхээс буулгах талаар эрх баригч Ардын хүч намынхан мөн хэлэлцэж эхэлсэн мэдээ байна. Мөн Өмнөд Солонгосын Зэвсэгт хүчин Ерөнхийлөгчийн шийдвэрийг дэмжихгүйгээ илэрхийлж, топ командлагчид нь эрх баригчдыг биш, харин ард түмнээ хамгаалахыг алба хаагчдадаа даалгажээ.
Ард түмэн ч эсэргүүцлээ илэрхийлж, сая гаруй гишүүнтэй Үйлдвэрчний эвлэл гэхэд л Ерөнхийлөгчийг огцрох хүртэл жагсаал цуглаан зохион байгуулахаа мэдэгдээд байна. Цэргийн онц байдал тогтоохыг эсэргүүцэж Ерөнхийлөгчийн Тамгын газрын ажилтан, албан хаагчид өөрсдийн хүсэлтээр ажлаасаа чөлөөлөгдөж, олноороо ажил хаяхаар болжээ.
Ерөнхийлөгч Юн Сок Ёль Хойд Солонгосын аюул заналхийллээс сэргийлж, цэргийн онц байдал тогтоохоос аргагүйд хүрлээ гэж мэдэгдсэн ч угтаа өөрийгөө хамгаалах арга мухардсандаа ийм алхам хийсэн гэж ажиглагчид үзэж байна. 2022 оны тавдугаар сард төрийн тэргүүн болсноосоо хойш хүч нөлөөгүй, сул дорой гэгдэж ирсэн тэрээр өнгөрсөн дөрөвдүгээр сард сөрөг хүчний нам нь сонгуульд ялалт байгуулснаас хойш хүссэн хуулиа парламентаар батлуулж чадахаа больжээ. Харин энэ даваа гарагт сөрөг хүчин төсвийн шинэчилсэн хуулийг нь батлалгүй, хориг тавьсан нь өчигдрийн гэнэтийн шийдвэр, одоогийн улс төрийн хямралд хүргээд байна.
.avif)
