Туркийн хойд хэсэгт орших Болу хотын төвд байрлалтай цанын баазын зочид буудалд гал гарч, хамгийн багаар бодоход 76 хүн амь үрэгдэн, хэдэн арван хүн түлэгдэж, гэмтэж бэртсэн байна. 12 давхар “Гранд Картал” зочид буудалд гал гарах үеэр барилгад нийт 234 хүн байжээ. Туркийн Дотоод явдлын яам эхлээд 10 хүн амиа алдсан гэж мэдэгдэж байсан ч хохирогчдын тоо хэдхэн цагийн дотор ийнхүү нэмэгдсэн байна. Амь үрэгдэгсдийн дор хаяж хоёр нь галаас зугтахаар цонхоор үсэрч амиа алджээ.
Гал сөнөөгчид бүтэн 12 цаг ажиллаж байж галыг унтраасан байна. Албаныхан зочид буудлын аюулгүй байдлыг бүрэн хангаж ажиллаагүй хэмээн эхний байдлаар дөрвөн хүнийг баривчлаад байгаагийн дотор баазын эзэн байгаа аж. Галын шалтгаан одоогоор тодорхойгүй байгаа авч зарим гэрчийн мэдүүлснээр зочид буудлын гал тогоо байрладаг дөрөвдүгээр давхрын жигүүрээс гал эхэлж дэгдсэн гэнэ. Туркт сурагчдын хоёр долоо хоногийн өвлийн амралт дөнгөж эхлээд байгаа тул амь үрэгдэгсдийн дунд бага насны хүүхдүүд олон байж магадгүй гэж албаныхан эмээж байна.
.avif)
