Украины Ерөнхийлөгч Володимир Зеленський Германы Мюнхен хотноо болж байгаа Олон улсын аюулгүй байдлын чуулганд хэлсэн үгэндээ америкчуудад итгэх аргагүй боллоо гэсэн битүү хатуу утгатай үг хэлээд оронд нь европчууд өөрсдөдөө найдах цаг ирлээ, Оросын түрэмгийллээс сэргийлэхийн тулд бүх Европын нэгдсэн Зэвсэгт хүчинтэй болцгооё гэжээ. Орос, Америкийн төрийн тэргүүн нар Украины дайныг эцэслэхээр яриа хэлэлцээ эхлүүлэхээр болсон гэсэн мэдээ хэд хоногийн өмнө цацагдсан. Харин Зеленський Украины асуудлыг Украины оролцоогүйгээр шийдэх гэсэн ямар ч үйлдлийг хүлээн зөвшөөрөхгүй гэжээ. Тэрээр Ерөнхийлөгч Трамптай утсаар ярьсан тухайгаа хэлэхдээ “Трамп нэг ч удаа америкчуудад Европын хамтын ажиллагаа чухал тухай дурдаагүй. Энэ нь нөхцөл байдал өмнөхөөсөө өөр болсныг харуулж байна” гэсэн байна.
АНУ-ын Дэд ерөнхийлөгч Ж.Д.Вэнс дээрх чуулганд баасан гарагт хэлсэн үгэндээ Европын орнууд өөрсдийн батлан хамгаалах салбарыг хариуцах цар ирсэн гэж хатуу анхааруулсан нь олон улсын дургүйцлийг хүргэсэн юм. Европын олон орны албаныхан Ж.Д.Вэнсийн эл мэдэгдлийг НАТО, Америкийн харилцаа нэгэнт өөрчлөгдсөний илрэл гэжээ. Энэ долоо хоногийн эхээр Америкийн Батлан хамгаалахын сайд Пит Хегсет Украины нутаг руу Орос халдсан явдал нь НАТО-д шинэчлэл хэрэгтэйн баталгаа гэж мөн онцолсон байна.
Нэгдсэн Европын тусгай хүчин байгуулах санаачилгыг өмнө нь Францын Ерөнхийлөгч Эмманюэль Макрон нарын удирдагчид мөн гаргаж байсан юм.
Оросын Зэвсэгт хүчин Украин руу эзлэн түрэмгийлсний гурван жилийн ой энэ сарын 22-нд тохионо. Америкийн шинэ засаг захиргаа дайныг эцэслэе гэвэл талууд хэн хэндээ буулт хийх ёстой гэж удаа дараа мэдэгдэхийн хамт сүүлийн үед Украины НАТО-гийн гишүүн болохыг дэмжихгүй, 2014 оноос өмнөх хуучин хилийн зурвасаа сэргээж чадахгүй гэдэгтэйгээ эвлэрэх ёстой гэсэн байр суурь илэрхийлсээр байгаа юм.
.avif)
