БНСУ-ын Ерөнхийлөгч Юн Сок Ёль мягмар гаргийн орой 23:00 цагийн үед улс орондоо цэргийн онц байдал тогтоож, хэдхэн цагийн дараа шийдвэрээ цуцалсан билээ. Парламентын гишүүд нь төрийн тэргүүнээ эсэргүүцэн, тэр дороо Үндэсний ассамблейн байр луугаа цэрэг цагдаагийн хамгаалалтыг үл тоон дайран орж, шийдвэрийг нь цуцлах тогтоол баталсны дээр ард иргэд хэдэн мянгаараа гарч жагссан. Харин Юн Сок Ёль энэхүү гэнэтийн, цочир шийдвэрийн төлөө ард түмнээсээ уулчлалт гуйлаа. Тэрээр ахин ийм зүйл давтагдахгүй гэсэн ч өөрийнх нь эрх баригч нам болон сөрөг хүчнийхэн нь түүнийг яагаад ч үргэлжлүүлэн албыг нь хашуулахгүй хэмээн мэдэгдсээр байна.
Өмнөд Солонгосын гол нам, хүчнүүд өчигдөр Ерөнхийлөгчийг огцруулах үйл явц буюу албан журмаар импичмент хийх хэлэлцүүлгийг эхлүүлсэн бөгөөд өнөөдөр парламентад санал хураана. Гишүүдийн олонх буюу гуравны хоёр нь дэмжихэд л төрийн тэргүүнийг огцруулах тухай тогтоол батлагдах юм.
Ерөнхийлөгч Юн Сок Ёль ард иргэдийнхээ дунд ихээхэн нэр хүнд муутай бөгөөд парламентад сөрөг хүчин олонх болсноос хойш улс төрийн эрх мэдлээ ч алдаж эхэлсэн тул арга мухардсандаа цэргийн онц байдал тогтоохыг оролдсон гэж ажиглагчид үзэж байгаа. Түүнийг тэргүүн хатагтайн байр сууриа алдахгүй гэсэн эхнэрийнхээ шахалтад орж, албан тушаалаа урвуулан ашигласан гэх хүмүүс ч байгаа аж. Гэхдээ гэнэтийн шийдвэрийнх нь ард чухам яг ямар учир шалтгаан байсан нь одоо ч тодорхойгүй байна. Цэргийн онц байдал тогтоож буйгаа зарлахаасаа өмнө Ерөнхийлөгч өөрийн намын дарга болох Ардын хүч намын тэргүүн Хан Дан Хун болон гол сөрөг хүчин Ардчилсан намын дарга И Жа Мён, мөн сөрөг хүчнээс сонгогдсон парламентын гурван ч гишүүн, Тагнуулын ерөнхий газрын орлогч дарга нарын нэр бүхий албан тушаалтнуудыг баривчлах шийдвэр гаргаад байсан нь өчигдөрхөн ил болж, олны дургүйцлийг хүргээд байгаа юм. Ерөнхийлөгчийн “хар данс”-нд өөрийг нь эсэргүүцдэг өөр олон хүний нэр бичээтэй байсан гэсэн мэдээ ч байна.
.avif)
