Төрийн байгууллагуудын цахим хуудсуудыг нэгтгэсэн цахим хуудас Gov.mn албан ёсоор ашиглалтад орж нийслэл, орон нутгийн 1000 гаруй төрийн байгууллага нэгдсэн стандарт, загвартайгаар мэдээллээ байршуулаад байна.
Монгол Улсын төрийн бүх байгууллагуудын үйл ажиллагаа, мэдээ, мэдээлэл, төрийн үйлчилгээг нэг дороос авах боломжтой www.gov.mn цахим хуудсыг "И-Монгол академи" УТҮГ хөгжүүлж, 2023 оны 12-р сараас эхлэн олон нийтэд нээлттэй болж төрийн байгууллагууд мэдээллээ нэгтгэж эхэлсэн бол /2025.02.10/ албан ёсоор хэрэглээнд нэвтэрч Цахим хөгжил, инновац, харилцаа холбооны сайд Ц.Баатархүү уг нэгдсэн цахим хуудасны үйл ажиллагааг олон нийтэд танилцууллаа.
Өнөөдрийн байдлаар Монгол Улсад 16 яам, 37 агентлаг, төрийн өмчит 1000 гаруй байгууллага үйл ажиллагаа явуулж байна. Үндэсний дата төвд бүртгэлтэй 1441 төрийн байгууллага gov.mn домэйн бүхий 4784 цахим хуудастай. Эдгээр байгууллагууд цахим хуудсаа хөгжүүлж, шинэчлэх зорилгоор жил бүр төсөв батлуулдаг бөгөөд зөвхөн 9 яам нэг жилийн хугацаанд дунджаар 11,331,000 төгрөг зарцуулдаг гэсэн тооцоог хийжээ.
Цахим хөгжил, инновац, харилцаа холбооны сайд Ц.Баатархүү “Ер нь улс орнууд, Засгийн газар нь нэгдсэн нэг л цахим хуудастай байдаг. Иргэд аймгуудын Засаг даргын тамгын газрын вэб сайт, яам, агентлаг гээд тус тусын өөр өөр сайт руу орохгүйгээр нэг цонхноос бүх мэдээллийг авдаг болно. Цаана нь хиймэл оюун ухааны алгоритм ажиллах учраас нэг цонхоор бүх мэдээллээ авах боломжтой. Одоо байгаа вэб сайт цахим хуудаснуудыг яваандаа хаана” гэлээ.
.avif)
