Нийслэлийн дэд бүтцийг хөгжүүлэх зорилготой төслийн нэг болох Улаанбаатар метроны бүтээн байгуулалтад ашиглалт, засвар хариуцах инженер техникийн мэргэжилтэн ШУТИС-тай хамтарч бэлтгэхээр НЗДТГ, БНСУ-ын "Dohwa Engineering" компани гурван талт санамж бичгийг есдүгээр сард байгуулсан.
Метрог ажиллуулахад шаардлагатай боловсон хүчин бэлтгэхтэй холбоотой зарим ажлын тухай Механик инженер, Тээврийн Сургуулийн захирал доктор, дэд профессор Н.Пүрэвдорж хэлэхдээ, “Механик, инженерийн сургуульд 2025 оны 9 дүгээр сарын 1-нээс метроны инженер, техникийн мэргэжлээр дөрвөн анги нээж, анхны элсэлтээ авна. Дараах дөрвөн ангидаа нийт 600 оюутан элсүүлэх төлөвлөгөөтэй байна. Оюутнууд 2+2 хөтөлбөр буюу эхний хоёр жил ШУТИС-д, дараагийн хоёр жил БНСУ-ын их сургуульд сурна. Бид “Халла” их сургууль болон Нийслэлийн Засаг даргын Тамгын газартай ярилцаад, шинээр элсэж буй оюутнуудад тэтгэлэгт хөтөлбөр зарлахаар ажиллаж байна. БНСУ-д суралцахын тулд үндсэн инженерчлэлийн суурь хичээлүүд мөн солонгос хэлний хичээлийг нэмж үзэх шаардлагатай байгаа. ШУТИС-ийн зүгээс солонгос хэлний хичээлийг хэрхэн, яаж явуулах, зохион байгуулах чиглэлээр ажиллаж байна” гэлээ. Дашрамд дурдахад, Цаашид энэхүү мэргэжлээр Монголдоо 100% сурах боломжтой болгох аж. Үүнээс өмнө дотоодын багш нарыг 6 сарын хугацаатай сургах, хамтарсан сургалтын хөтөлбөр боловсруулах ажлын хэсэг ажиллаж байна.
.avif)
